ХІІІ. Аспан көпір әсерлері
Қалаға түнде жеттік. Алған әсерін толық сезініп болмаған жастардың қуаты әлі де таусылмапты. Ертең жол жүріп кететін болғасын, түн ауып бара жатқанына қарамастан жатақханаға кірмей, бірден Ертіске тарттық. Кешеден бері ары да, бері де көлікпен зуылдап өткен алып көпірді енді асықпай тамашалағысы келген болар, бір топ жас жылдам жүріспен жаяу-ақ жетіп қалды.
О-һһ-ооо! Мынадай көпір Алматыда жоқ. Болуы мүмкін де емес. Астанада да жоқ. Астанада жоқ дегеніміз, бұл көпірдің басқалардан ерекшелігінде. Есілдің үстіндегі көпірлер жаңаша стильде, өзгеше мазмұнда салынған. Ал бұл көпір кәдімгі теледидардан көретін Ыстамбулдың алып аспалы көпірлері секілді дәстүрлі әдіспен салынған. Бастан аяқ ұзындығы төрт шақырым деп естідік. Екі жағалауында екі-екіден алып екі бағанасы бар. Аспанмен таласып тұр. Бұл аспалы көпір емес, бұл «аспан көпірі».
Көпірлер, алып көпірлер... тіршілікті бір-бірімен жалғаушы алып көпірлер. Адамзат көпірлерлерге мұқтаж. Әсіресе рухани көпірлерге. Олар болмаса жер бетінде қозғалыс тоқтап қалатын секілді. Біздің ел осы қағидатты анық түсінуі тиіс. Шүкір, түсініп те келеді.
Достарыңызбен бөлісу: |
